Kuri uyu wa 9 Werurwe 2026, Ikigo Access to Finance Rwanda (AFR) gishyigikira gahunda n’imishinga ifasha abantu n’ibigo kubona serivisi z’imari cyatangije gahunda nshya yiswe Terimbere MSME Facility, igamije gufasha ibigo bito n’ibiciriritse mu Rwanda kubona serivisi zibifasha guteza imbere ubucuruzi bwabyo no kubona imari yo kubwagura.

AFR yatangije Terimbere MSME Facility igamije gufasha ibigo bito n’ibiciriritse kubona inkunga yo kwagura ubucuruzi. Iyi gahunda yatangirijwe mu nama yabereye i Kigali, igamije guhuza ibigo bito n’ibiciriritse bikenera ubufasha, abatanga serivisi z’iterambere ry’ubucuruzi ndetse n’ibigo by’imari bishaka gushora mu mishinga ifite ubushobozi bwo gukura.

Binyuze muri Terimbere MSME Facility, ba rwiyemezamirimo bazajya bahabwa ubujyanama mu micungire y’imari, kunoza imikorere y’ubucuruzi, kwamamaza ibicuruzwa na serivisi, ndetse no gutegura imishinga ishobora kubona ishoramari. Iyi gahunda kandi ikorana n’ibigo by’imari n’abashoramari kugira ngo ibigo bito n’ibiciriritse bibone ibisubizo by’imari birimo inguzanyo zibagenewe, ingwate zibafasha kubona inguzanyo ndetse n’izindi serivisi z’imari zibafasha kwagura ibikorwa byabo. Mu rwego rwo gufasha cyane cyane abikorera bo mu cyaro no mu nkengero z’imijyi bashobora kuba bafite imbogamizi zo kubona amakuru cyangwa serivisi, iyi gahunda yashyizeho ibiro byayo mu turere twa Musanze, Rubavu, Rusizi, Kayonza na Huye.Umuyobozi Mukuru wa Access to Finance Rwanda, Jean Bosco Iyacu, yavuze ko iyi gahunda ari intambwe ikomeye mu guteza imbere urwego rw’ubucuruzi mu Rwanda.Yagize ati: “Terimbere MSME Facility izafasha ibigo bito n’ibiciriritse kubona serivisi n’imari bibafasha kwagura ibikorwa byabyo, kwihagararaho no gutanga akazi gafite agaciro.”

Iyi gahunda kandi yatekerejweho mu buryo bwita ku bwuzuzanye n’uburinganire, aho izibanda cyane ku gufasha abagore, urubyiruko, impunzi, abafite ubumuga ndetse n’abakora ubucuruzi mu cyaro, kugira ngo nabo babone amahirwe yo guteza imbere ibikorwa byabo. Biteganyijwe ko Terimbere MSME Facility izagira uruhare mu gufasha ibigo bito n’ibiciriritse gukura no kongera imirimo, bityo igafasha mu guteza imbere ubukungu bw’u Rwanda muri rusange.

Abifuza gukoresha izi serivisi bashobora kwiyandikisha ku rubuga rwa Terimbere MSME Facility aho berekana ibyo bakeneye cyangwa serivisi batanga kugira ngo bahuzwe n’abafatanyabikorwa babafasha, banyuze ku rubuga rwo kwiyandikisha. https://terimberemsme.rw

Lydia MUTAMBA